आरोग्य, आनंदी जीवन आणि ज्येष्ठ अभियंत्यांचा सन्मान; सर विश्वेश्वरय्या यांच्या कार्याला उजाळा
पिंपरी : भारतरत्न सर मोक्षगुंडम विश्वेश्वरय्या यांना अभियंत्यांचे दैवत, स्फूर्तिस्थान आणि ऊर्जास्रोत मानत पिंपरी-चिंचवडमधील अभियंत्यांनी यंदाचा ‘अभियंता दिन’ उत्साहात साजरा केला. १५ सप्टेंबर २०२६ रोजी झालेल्या या संस्मरणीय सोहळ्यास वयाची ६० ते ८८ वर्षे असलेले २०० हून अधिक अभियंते उपस्थित होते. अभियंत्यांमधील बंधुभावाचे दर्शन घडविणारा हा सोहळा ठरला.
कार्यक्रमाची सुरुवात सर विश्वेश्वरय्या यांच्या प्रतिमेस पुष्पहार अर्पण करून दीपप्रज्वलनाने झाली. ‘स्टार प्रवाह’वरील ‘मी होणार सुपरस्टार महाराष्ट्राचा-२०२२’ स्पर्धेचे फायनलिस्ट अभियंता डी. व्ही. कुलकर्णी यांनी गीत सादर करून उपस्थितांचे स्वागत केले. महावितरणचे संचालक (मानव संसाधन) राजेंद्र पवार यांचा शुभेच्छा संदेश व्हिडिओद्वारे दाखविण्यात आला.
आरोग्य आणि आनंदी जीवनावर मार्गदर्शन
ज्येष्ठ हृदयरोगतज्ज्ञ डॉ. जगदीश हिरेमठ यांनी ‘सिनिअर्सची रिजनरेटिव्ह कॅपॅसिटी’, आरोग्य आणि ‘हेल्थ स्पॅन’ यावर मार्गदर्शन केले. Aim, Bonds, Community Living, Diet, Exercise-Rest, Finances/Insurance, Gratitude, Health/Humour आणि Instruments/Immunisation या बाबींचे महत्त्व त्यांनी स्पष्ट केले. नियमित व्यायाम, योग्य आहार, पुरेशी झोप, आरोग्यविषयक आर्थिक नियोजन आणि कुटुंबीयांशी संवाद यावर त्यांनी भर दिला.
डॉ. प्रसन्न गद्रे यांनी ‘साठीनंतरचे आयुष्य’ या विषयावर व्याख्यान देताना उत्साही वृत्ती, व्यायाम, जीवनशैली, आहार आणि मानसिक आनंद यांचे महत्त्व सांगितले. ‘HELEN’ या संकल्पनेतून Health, Exercise, Lifestyle, Environment आणि Nutrition याबाबत त्यांनी मार्गदर्शन केले.
ज्येष्ठ अभियंत्यांचा सन्मान
वयाची ८० वर्षे पूर्ण केलेल्या ज्येष्ठ अभियंत्यांचा विशेष सत्कार करण्यात आला. तसेच सर विश्वेश्वरय्या यांच्या देशाच्या उभारणीतील योगदानाचा आढावा घेण्यात आला. प्रत्येक अभियंत्याला सर विश्वेश्वरय्या, कोअर ग्रुपचा लोगो, श्री विठ्ठल-रुक्मिणी यांच्या प्रतिमा आणि संतश्रेष्ठ ज्ञानेश्वर माऊलींचे पसायदान असलेले स्मृतिचिन्ह देण्यात आले.
जुन्या आठवणींना उजाळा
समारंभासाठी औरंगाबाद, धुळे, सोलापूर आणि मुंबई आदी ठिकाणांहूनही अभियंते उपस्थित झाले. ज्येष्ठ अभियंता माधवजी देशिंगकर यांनी आपल्या ‘वालचंदच्या सीमेवर’ आणि ‘मंकी हिल्स’ या पुस्तकांच्या सुमारे ८० प्रती ज्येष्ठ अभियंत्यांना भेट दिल्या. तसेच सामाजिक कार्यासाठी मनोहरजी कोलते आणि योगशास्त्रातील कार्यासाठी सोन्याबापू बोरोटीकर यांचा विशेष सन्मान करण्यात आला.
या सोहळ्याच्या आयोजनासाठी अविनाश पाटोळे, महेंद्र दिवाकर, अजित महादार, सुरेश गायकवाड, हनुमंतजी मोरे, नंदेश माने, कोंडीभाऊ भोर आणि कोअर ग्रुप लीडर सतीश शिंदे यांच्यासह अभियंता मित्रांच्या टीमने परिश्रम घेतले. महिनाभराच्या नियोजनातून २७६ अभियंत्यांची नोंदणी झाली आणि २०० हून अधिक अभियंते प्रत्यक्ष उपस्थित राहिले.
या संस्मरणीय सोहळ्यानंतर दरवर्षी विभागवार ‘अभियंता दिन’ साजरा करण्याची सूचना अनेक अभियंत्यांनी व्यक्त केली.
✍🏻मुख्य संपादक – लहू राम अडसूळ
