पोलीस प्रशासनाची तात्काळ कारवाई…दोषीला कठोर शिक्षा झालीच पाहिजे.!
आज प्रभागातील विद्यानगर येथे ८ वर्षाच्या मुलीवर अत्याचार करण्यात आल्याची घटना घडली. त्या संदर्भात तेथील संबंधित पिंपरी पोलिस स्टेशनचे वरिष्ठ पोलिस निरीक्षक यांच्या समवेत तेथील महिला व नागरिकांची मीटिंग घेण्यात आली. संबंधित गुन्हेगाराला कठोर शिक्षा व्हावी हि मागणी यावेळी सर्वांनी केली. या मीटिंग मध्ये विद्यानगर भागात मागील काही काळापासून नोकरी, व्यवसायासाठी बाहेरून येणाऱ्या तरुणांना घरे भाड्याने देण्यात आली आहेत, या भाडेकरूंची पोलीस पडताळणी करण्यात यावी हि देखील मागणी यावेळी करण्यात आली. पुढील काळात प्रभागातील वसाहतींमध्ये अशा प्रकारच्या घटना घडू नयेत यासाठी सर्व नागरिकांनी देखील जागरूक आणि सतर्क राहणे गरजेचे आहे. या घटनेतील दोषीला कठोर शिक्षा होई पर्यंत पोलीस प्रशासनाचा पाठपुरावा करण्यासाठी मी कटिबद्ध आहे.
विद्यानगर परिसरात एका ८ वर्षांच्या निष्पाप चिमुकलीवर झालेला अत्याचार अत्यंत संतापजनक आणि माणुसकीला काळिमा फासणारा आहे. आपल्या शहरात अशा विकृत प्रवृत्ती डोकं वर काढत असतील, तर त्यांना वेळेतच ठेचून काढणे ही आपली सर्वांची जबाबदारी आहे.
या घटनेची गांभीर्याने दखल घेत, पोलीस बांधवांनी तपासाची सूत्रे अत्यंत जलद गतीने हलवली आहेत. आरोपी हा अल्पवयीन निष्पन्न झाल्यामुळे पोलिसांनी त्याला तात्काळ ताब्यात घेऊन बालसुधारगृहात (बालकारागृहात) रवानगी केली आहे. गुन्हेगाराची विकृती पाहता, कायद्याच्या चौकटीत राहून त्याला कठोरातील कठोर शिक्षा कशी होईल, यासाठी पोलीस प्रशासन आणि आम्ही सर्वजण कटिबद्ध आहोत. तसेच, भविष्यात अशा घटनांना आळा घालण्यासाठी आणि परिसरातील महिला, मुली व नागरिकांच्या सुरक्षेसाठी विद्यानगर परिसरात तात्काळ सीसीटीव्ही कॅमेरे बसवण्याची यंत्रणा गतीने कार्यान्वित करण्यात आली आहे.
पोलीस प्रशासनाला विनंती करतो की, या प्रकरणाचा तपास जलदगतीने पूर्ण करून पीडित कुटुंबाला लवकरात लवकर न्याय मिळवून द्यावा. जोपर्यंत पीडितेच्या कुटुंबाला पूर्ण न्याय मिळत नाही, तोपर्यंत आमचा पाठपुरावा अखंड सुरू राहील. आम्ही या लढ्यात पीडित कुटुंबासोबत खंबीरपणे उभे आहोत.
अशा विकृत मानसिकतेच्या गुन्हेगारांना समाजात अजिबात स्थान नाही!
✍🏻मुख्य संपादक – लहू राम अडसूळ
